पाऊस पडून गेल्यावर

पाऊस पडून गेल्यावर, तरतरली तृणपात 

झटकून दिली साचलेल्या मरगळीची कात 

पाऊस पडून गेल्यावर, कपाशी ढगाचा थाट 

सुवर्णकिरीट धारी मेघाची आगळीच  बात 

पाऊस पडून गेल्यावर, मृदगंध गेला गगनात 

गगनाच्या सजावटीला उधळले रंग सात 

पाऊस पडून गेल्यावर, चिंबलेली पाऊलवाट 

गाठू पाहते खुळी पावसाला पुन्हा क्षितिजात 

पाऊस पडून गेल्यावर, संपत आलेली रात 

रंगली ती हौशी सांडेतो चांदणे अंगणात 

पाऊस पडून गेल्यावर, पक्ष्यांचा किलबिलाट 

आळवती सप्त स्वर, साठवले थेंबाथेंबात  

पाऊस पडून गेल्यावर, आठवणींच्या गर्तात 

गढून गेलेली एक मुग्ध, सात्विक पहाट 

तेजश्री

१४.१0.२०११ 

शब्द

अनाहूत शब्दाला कुठली किनार भावनेची  

दाटलेल्या पाण्याला पकड काजळ रेषेची 

कधी सहज शब्द बरेच काही बोलून जाती 

बोचणाऱ्या अर्थाची त्यांना नसते भीती 

अश्रूंनी काजळरेष तोडल्याची नाही तमा साधी  

काळा डाग लागला तरी नाही वाटत अपराधी 

वारंवार काढली खपली तर जखमा भळभळती 

नकळतचे घाव ठेवी व्रण कायमचाच मनावरती 

शब्द असे सामर्थ्य भात्यामधला अंतिम शर 

घोट नरडीचा घेई  सुटला इच्छा डावलून जर 

जपून वापरावे असे हे शस्त्र खात्रीचे आहे जरी 

दुःख देण्यास पुरे आहे काट्याएवढे लहानगे तरी 

तेजश्री 

३.१०.२०११ 

पाऊसाची मिठी

आज माझ्या अंगणी 

पाऊस आला होता 

तुझ्या नसण्याची 

कमी पूर्ण करायला 

पावसाची मिठी 

तितकीच आश्वासक 

अगदी तुझ्या मिठीची 

आठवण करून द्यायला 

घट्ट छातीपाशी धरत 

त्यानी माझे ठोके ऐकले

अगदी हुबेहूब तसेच 

जसे तुच  ऐकायला 

त्यानी स्वतःत सामावून 

घेतले डोळा पाणी 

स्व अस्तित्व लावले

संपूर्ण विसरायला 

पाऊस माझ्या पदराशी 

चाळे करत होता 

अगदी तसाच जणू 

तु लहानांगत खेळायला 

 

पाउसातला पाऊस आज 

राहिला नव्हता 

जसा तु माझ्याहून 

नाहीसच वेगळा 

तेजश्री

०१.१०.२०११