आठवण

वारा बोचणारा सुटला, आणि निसरडी झाली वाट
आठवण काढण्यासाठीच तुझी, जणू येते रोज रात

गंध दाटे नभात तुझ्या सहवासाचा
आज मात्र एक एक क्षण, विरहात काढण्याचा

द्वंद्व तुझ्या-माझ्यात उगाच लटके
शब्द मात्र काढती एकमेकांचे लचके

मग पाठोपाठ पुन्हा, जातात एकामागून एक राती
झोप उडून नयनांची, ओली मात्र होते उशी

किती प्रेम, किती विश्वास किती अपेक्षा आणि किती श्वास
अडकले एकमेकांत म्हणून तर रोखून धरतात प्राण बास !

तेजश्री
२३.६.२०१३

पाऊस

एक टपोरा थेंब टपकन गाली पडला 

हुळहुळत खाली जाता शहारा आला 

थेंबान मागून दबकत पाऊस आला 

हळुवार माझ्या कानात  कुजबुजला  

देतेस मला साथ डोंगरापर्यंत 

सहप्रवासात असेल गंमत

अपोआप पावले डोंगराकडे वळली 

पावसाच्या साथीने वाट चिंब झाली 

पाऊस उमदा सार्यांशी नाते जपत होता 

प्रेमाच्या सरीत सार्यांना भिजवत होता 

छोट्या छोट्या झुडुपांवर लाल पिवळी फुले 

इवले इवले गवत थेंबांना घट्ट बिलगले 

पाऊस नाचत नाचत पुढे पळत होता 

क्षितिजापर्यंत एका दमात जात होता 

पावसात भिजलेली पाउलवाट नववधू भासे 

पाउस तिचा साजण श्वासा श्वासात  हसे

पाऊस मला भिजवू पाहात होता 

भिजवता स्वतःच चिंब भिजत होता 

चिंब भिजलेल्या पावसात रूप न्यार

भिजलेल्याच पावसाच चित्र प्यार

तेजश्री

०५.०६.२०१३