आज काल मी तुझ्याकडे बघत बसतो एकटक
डोळ्यांची पापणीही न हलवता बिनदिक्कत
तू ठीक नऊला येणार माहीत असतं मला
घट्ट खुर्चीत बसून घेतो फक्त तुला पहायला
दहा मिनिट आधीच चहा नाश्ता उरकतो
अस वाटत कधी एकदा खिडकीतून पाहतो
तुझ्यावर खर्चायला खिशातले पैसे चाचपडतो
मोबाईलचे notification मी बंद करतो
काय तुझे नखरे आणि काय तुझी अदा
जेव्हा पासून कळलीस मी तुझ्यावर फिदा
तुझे हिरवे डोळे बघायला मी झालो बेभान
तू माझी लैल्ला आणि केवढा ग तुझा मान
कधी कधी किती छान जमत नाही आपलं ?
माझ्या मोजलेल्या किमतीचं तुझ रोख उत्तर
झटपट मिळतो मोबदला अन
मिळतो निस्सीम आनंद
हृदयात उमटतात कल्पनेचे तरंग
अस वाटत आता तू फुलशील
खूप उंच भरारी घेशील
माझ्या ' तूट ' पुंजीला
गगनात घेऊन जाशील
कल्पना येते इमले बांधायची
मुलांचे हट्ट पुरवून बायकोला साडी आणायची
एखादी बियर ही रीचवयाची ठरवतो
तुझ्या आलेखाबरोबर मीही हवेत तरंगतो
खिसा हळू हळू फुगत असतो
आणि अचानक कोण जाणे तुला येतो राग
धाडकन घालतेस पेकाटात लाथ
हिरवे डोळे लाल होतात
माझे खिसे फाटके होतात
मुलांची चिवचिव गोंगाट वाटते
बायकोची हाक पारा माझा चढवते
साऱ्यावर निघतो तुझ्यामुळे राग
कारण तुला पडताना बघायचा मी केलाच नसतो विचार
बायको मग सखी बनते
मलाच काही समजावते
आकर्षण आणि प्रेमातला फरक कर म्हणते
वाचायला लावते तुझ्यावरली बुके
गिरव म्हणते सारे सारे धडे
खाच खळगे समजून घे आणि मग मार उडी
बायकोचं म्हणातिये खर प्रेम चाचपड आधी
आता मी ठरवलंय तुझ्या नखर्याला नाही भुलयाच
डोळे उघडे ठेवून निर्णय घ्यायचा
प्लॅन A बरोबर प्लॅन B आधीच ठरवून घ्यायचा 😂
(स्टॉक मार्केट वर आधारित )
तेजश्री
